श्रीरामपूर (प्रतिनिधी) – पंढरपूरच्या दिशेने प्रस्थान केलेल्या श्री संतश्रेष्ठ निवृत्तीनाथ महाराज पालखीचे श्रीरामपूर शहरात भारतीय जनता पक्षाच्या वतीने जुना नाका, संगमनेर रोड येथे अत्यंत भव्य आणि भाविक भक्तिभावाने स्वागत करण्यात आले. या स्वागत कार्यक्रमात परिसर दिंडीतील वारकऱ्यांच्या नामघोषांनी आणि ‘पांडुरंग, पांडुरंग’च्या जयघोषांनी दुमदुमून गेला होता. या स्वागत सोहळ्यावेळी भारतीय जनता पार्टीचे जिल्हाध्यक्ष नितीनभाऊ दिनकर तसेच शहराध्यक्ष जितेंद्र छाजेड यांनी पालखीचे विधिवत पूजन करून दर्शन घेतले. यानंतर संपूर्ण परिसरात विठोबाच्या नामस्मरणाचा जयघोष करण्यात आला. यावेळी भाजपा पदाधिकारी व कार्यकर्त्यांनी पायी चालत येणाऱ्या भाविक वारकऱ्यांसाठी पाण्याचे, मिठाईचे तसेच अल्पोपहाराचे मोफत वाटप केले. या उपक्रमातून भाजपाच्या सामाजिक बांधिलकीचे दर्शन घडले.
या सोहळ्यात माजी शहराध्यक्ष मारुती बिंगले, माजी नगराध्यक्ष संजय फंड, सांस्कृतिक सेल जिल्हाध्यक्ष बंडूकुमार शिंदे, रुपेश हरकल, व्यापारी असोसिएशनचे अध्यक्ष गौतम उपाध्ये, डॉ. मनोज छाजेड, आशिष धनवटे, संजय गांगड, विजय आखाडे, अक्षय गाडेकर, महेश सूळ, आनंद बुधेकर, अनिकेत भुसे, श्रेयस झिरगे, किरण कर्नावट, सोमनाथ गांगड, प्रतीक वैद्य, तेजस उंडे, योगेश ओझा, सुबोध शेवतेकर, इंजि. संदीप चव्हाण, विजयराव शेलार, कुणाल करंडे, मिलिंदकुमार साळवे, सुनील कपिले, राजेंद्र आदिक यांच्यासह अनेक पदाधिकारी, कार्यकर्ते आणि भाविक मोठ्या संख्येने उपस्थित होते.
विठोबाच्या पालखीचे दर्शन घेत असताना अनेकांनी श्रद्धेने डोळ्यांत अश्रू आणले होते. दिंडीतील टाळ-मृदुंगाच्या गजरात आणि भक्तीमय वातावरणात भाजपाच्या पदाधिकाऱ्यांनी सर्व भाविकांना प्रेमाने सेवा दिली. ठिकठिकाणी थांबून पालखीचे स्वागत करण्यात आले. अनेकांनी रांगोळ्या, फुलांची आरास, स्वागत फलक आणि सजवलेल्या मंडपातून भक्तीभावाने सहभाग घेतला. या संपूर्ण स्वागत सोहळ्याचे संयोजन भारतीय जनता पार्टीच्या सर्व पदाधिकाऱ्यांनी परिश्रमपूर्वक केले. या उपक्रमामुळे वारकरी संप्रदायातील भक्तगणांमध्ये आनंदाचे आणि समाधानाचे वातावरण पसरले. श्री संतश्रेष्ठ निवृत्तीनाथ महाराजांच्या पालखीचा हा सोहळा केवळ धार्मिक नाही तर सामाजिक एकात्मतेचा संदेश देणारा ठरला.
