श्रीरामपुर/प्रतिनिधी :– तालुक्यातील बेलापूर बु. ग्रामपंचायतीच्या वतीने ५ टक्के अपंग निधीच्या उपयोगातून दिव्यांग व्यक्तींना स्वावलंबनासाठी मदतीचा हात देण्यात आला आहे. ग्रामपंचायत सदस्य, अधिकारी आणि स्थानिक लोकप्रतिनिधींच्या एकत्रित प्रयत्नांतून नुकतेच ४ दिव्यांग व्यक्तींना बॅटरी सायकलचे वाटप करण्यात आले. ही उपक्रमशील संकल्पना जिल्हा परिषद सदस्य शरद नवले, बाजार समितीचे उपसभापती अभिषेक खंडागळे, सरपंच स्वाती अमोलिक, उपसरपंच प्रियंका कु-हे, ग्रामपंचायत सदस्य तसेच ग्रामपंचायत ग्रामसेवक अधिकारी निलेश लहारे यांच्या पुढाकारातून राबविण्यात आली.
या उपक्रमासाठी अशा दिव्यांग व्यक्तींची निवड करण्यात आली जिनके ऑनलाइन प्रमाणित दिव्यांगत्व प्रमाणपत्र असून जे पूर्णतः चालू शकत नाहीत. निवडलेल्या चारही लाभार्थ्यांना त्यांच्या हालचालींमध्ये मदत व्हावी यासाठी बॅटरी सायकली देण्यात आल्या आहेत. प्रत्येक सायकलची किंमत सुमारे ४४,५०० रुपये असून एकूण ४ सायकलींसाठी १ लाख ७८ हजार रुपयांचा खर्च ग्रामपंचायतीने केला आहे. विशेष म्हणजे, बॅटरी डिस्चार्ज झाल्यासही या सायकली पॅडल मारून सहज चालविता येऊ शकतात.
या उपक्रमामुळे लाभार्थ्यांच्या चेहऱ्यावर हास्य फुलले असून, त्यांना मिळालेल्या या स्वावलंबी साधनामुळे त्यांच्या दैनंदिन जीवनात मोठा बदल घडून येईल, असा विश्वास ग्रामस्थांनी व्यक्त केला आहे. ग्रामपंचायतीच्या सामाजिक उत्तरदायित्वातून राबविण्यात आलेला हा स्तुत्य उपक्रम इतर ग्रामपंचायतींसाठी प्रेरणादायी ठरतो आहे. दिव्यांग बांधवांना स्वाभिमानाने जगण्याची संधी मिळावी यासाठी अशा उपक्रमांची गरज अधिक प्रमाणात असल्याचे मत अनेकांनी व्यक्त केले.
