श्रीरामपूर (प्रतिनिधी): बहुप्रतिक्षित तालुक्यातील जिल्हा परिषद गट आणि पंचायत समिती गणांचे आरक्षण अखेर जाहीर झाले आहे. जाहीर झालेल्या आरक्षणानुसार, दत्तनगर, उंदिरगाव आणि बेलापूर हे जिल्हा परिषद गट अनुसूचित जाती प्रवर्गासाठी राखीव ठरले असून, टाकळीभान गट सर्वसाधारण महिला प्रवर्गासाठी आरक्षित करण्यात आला आहे. तर पंचायत समिती सभापतीपद यावेळी सर्वसाधारण प्रवर्गासाठी खुले राहणार आहे.
या आरक्षण सोडतीनंतर तालुक्यातील राजकीय समीकरणांमध्ये मोठे बदल होणार असून, अनेक इच्छुक नेत्यांच्या आशा-अपेक्षांवर विरजण पडले आहे. विशेष म्हणजे दत्तनगर आणि उंदिरगाव हे दोन्ही महत्त्वाचे गट अनुसूचित जातींसाठी आरक्षित झाल्याने विद्यमान आणि माजी सदस्यांसह नवोदित उमेदवारांमध्ये हलचालींना वेग आला आहे.
जिल्हा परिषद गट आरक्षण पुढीलप्रमाणे: दत्तनगर गट: अनुसूचित जाती (SC) प्रवर्गासाठी आरक्षित. उंदिरगाव गट: अनुसूचित जाती महिला (SC-महिला) प्रवर्गासाठी आरक्षित. बेलापूर गट: अनुसूचित जाती (SC) प्रवर्गासाठी आरक्षित. टाकळीभान गट: सर्वसाधारण महिला (OPEN-महिला) प्रवर्गासाठी आरक्षित. या आरक्षणामुळे तालुक्यातील प्रमुख गटांमध्ये अनुसूचित जाती प्रवर्गाला तीन गट मिळाले असून, हे प्रमाण लक्षवेधी ठरले आहे. मागील निवडणुकीत सामान्य प्रवर्गाला अधिक जागा मिळाल्या होत्या, मात्र यावेळी सामाजिक समतोल राखण्याच्या उद्देशाने आरक्षणात बदल झाला आहे.
पंचायत समिती सभापतीपदाचे आरक्षण: पंचायत समिती सभापतीपद यावेळी सर्वसाधारण (OPEN) प्रवर्गासाठी घोषित करण्यात आले आहे. मागील पंचवार्षिकात हे पद आरक्षित प्रवर्गाकडे होते. त्यामुळे यावेळी सर्व समाजघटकातील उमेदवारांना या पदासाठी संधी मिळणार आहे. या घोषणेमुळे अनेक वरिष्ठ सदस्यांच्या राजकीय अपेक्षा पुन्हा जागृत झाल्या आहेत.
पंचायत समिती गण आरक्षण पुढीलप्रमाणे: निमगाव खैरी गण: सर्वसाधारण (OPEN) प्रवर्गासाठी. उंदिरगाव गण: अनुसूचित जाती (SC) प्रवर्गासाठी. टाकळीभान गण: नागरी मागास महिला (OBC-महिला) प्रवर्गासाठी. निपाणी वडगाव गण: सर्वसाधारण महिला (OPEN-महिला) प्रवर्गासाठी. दत्तनगर गण: अनुसूचित जाती महिला (SC-महिला) प्रवर्गासाठी. उक्कलगाव गण: नागरी मागास (OBC) प्रवर्गासाठी. बेलापूर बुद्रुक गण: सर्वसाधारण महिला (OPEN-महिला) प्रवर्गासाठी. पढेगाव गण: अनुसूचित जमाती (ST) प्रवर्गासाठी.
आरक्षण सोडतीदरम्यान २०११ च्या जनगणनेच्या आकडेवारीचा आधार घेण्यात आला आहे. यातून असे स्पष्ट झाले की दत्तनगर गणात अनुसूचित जातींची आणि पढेगाव गणात अनुसूचित जमातींची लोकसंख्या सर्वाधिक आहे. त्यामुळे या दोन्ही गणांना अनुक्रमे SC आणि ST प्रवर्गाचे आरक्षण मिळाले आहे. तालुक्यातील समाजघटकांच्या प्रमाणानुसार करण्यात आलेले हे आरक्षण संतुलित ठरल्याचे प्रशासनिक सूत्रांचे म्हणणे आहे. मात्र काही गटांतील इच्छुकांनी अचानक झालेल्या प्रवर्गबदलामुळे नाराजी व्यक्त केली असून, काही ठिकाणी पक्षांतर्गत चर्चांनाही ऊत आला आहे.
या नव्या आरक्षणामुळे तालुक्यातील श्रीरामपूर, बेलापूर, टाकळीभान, दत्तनगर आणि उंदिरगाव परिसरातील राजकीय घडामोडींना वेग येण्याची चिन्हे दिसत आहेत. अनेक अनुभवी सदस्यांना नव्याने गण आरक्षित झाल्याने आपली रणनीती बदलावी लागणार आहे. विशेषतः SC आणि OBC प्रवर्गासाठी वाढलेल्या संधींमुळे स्थानिक राजकीय पक्षांमध्ये नव्या चेहऱ्यांना संधी मिळण्याची शक्यता वाढली आहे.आता आरक्षण निश्चित झाल्याने, जिल्हा परिषद आणि पंचायत समिती निवडणुकीचा शिलान्यास झाला आहे, असे म्हणणे वावगे ठरणार नाही. आगामी काळात इच्छुक उमेदवारांकडून पक्षनिष्ठा बदल, राजकीय समझोते आणि मतदारसंघातील प्रचाराचे नियोजन सुरू होईल. तालुक्याच्या राजकीय नकाशात बदल घडविणाऱ्या या आरक्षणामुळे श्रीरामपूरमध्ये आगामी निवडणुका अत्यंत चुरशीच्या होण्याची शक्यता व्यक्त केली जात आहे. या विषयी घेतलेला स्पेशल आढावा बघण्यासाठी येथे 👉क्लिक करा
