श्रीरामपूर (प्रतिनिधी) – तालुक्याच्या पूर्व गोदावरी काठावर वसलेल्या श्रीक्षेत्र अडबंगनाथ संस्थान, भामाठाण येथे गुरुपौर्णिमा अत्यंत भावपूर्ण आणि उत्साहात साजरी करण्यात आली. या प्रसंगी विविध भागांतून आलेल्या लाखो भाविकांनी आपल्या श्रद्धेचा उद्गार अडबंगनाथ महाराजांच्या चरणी अर्पण केला. या गुरुपौर्णिमा सोहळ्याच्या प्रमुख वेळी संस्थानाचे मठाधीपती स्वामी अरुणनाथगिरी महाराज यांनी उपस्थित भाविकांना मार्गदर्शन करताना सांगितले की, “सद्गुरू नारायणगिरी महाराजांच्या कृपेनेच आज आपणा सर्वांना श्री अडबंगनाथ महाराजांच्या दिव्य दर्शनाचा योग प्राप्त झाला आहे. ही कृपा नुसती नशिबाची बाब नाही, तर ही श्रद्धा, निष्ठा आणि साधनेचा परिपाक आहे.”
स्वामी अरुणनाथगिरी महाराज यांनी पुढे मार्गदर्शन करताना सांगितले की, “गुरू म्हणजे केवळ ज्ञानदाता नव्हे, तर अध्यात्मिक उन्नतीचे द्वार उघडणारा खरा मार्गदर्शक असतो. अडबंगनाथ महाराजांनी आपल्या जीवनातून भक्तांना श्रद्धा, संयम आणि सातत्यपूर्ण साधनेची जी प्रेरणा दिली आहे, ती प्रत्येकाच्या जीवनात सदैव प्रकाशमान राहावी, हीच गुरुपौर्णिमेची खरी शिकवण आहे.” गुरूशिष्य परंपरेतील नातं हे केवळ अध्यात्मिक शिक्षणापुरते मर्यादित नसून, ते जीवनाच्या प्रत्येक पैलूवर प्रकाश टाकणारे असते, असेही महाराजांनी सांगितले. अडबंगनाथ संस्थान हे गेल्या अनेक वर्षांपासून निष्ठावान भक्तांचे श्रद्धास्थान राहिले असून, येथे केवळ पूजेचा भाग नव्हे तर मन, कर्म आणि भावनेचा परिपाक घडतो. स्वामी अरुणनाथगिरी महाराजांच्या या मार्गदर्शनाने उपस्थित भाविक भारावून गेले. त्यांच्या प्रत्येक शब्दातून गुरूच्या कृपेचा अनुभव प्रत्ययाला आला. हजारो भक्तांनी ‘जय गुरूदेव’, ‘अडबंगनाथ महाराज की जय’ अशा गजरांनी संपूर्ण परिसर दुमदुमून टाकला.
गुरुपौर्णिमेच्या दिवशी पहाटेपासूनच भक्तगणांचा ओघ संस्थानात सुरू झाला होता. सकाळी महापूजा, अभिषेक व आरतीचे आयोजन करण्यात आले होते. मंदिर परिसर फुलांच्या सजावटीने नटलेला होता. विविध धार्मिक व सांस्कृतिक कार्यक्रमांनी वातावरण भक्तिमय झाले होते. भक्तांनी हरिनाम संकीर्तन, भजन, कीर्तन व गुरूचरित्राचे पठण करत अडबंगनाथ महाराजांच्या चरणी आपली अर्पणबुद्धी प्रकट केली. स्थानीय ग्रामस्थ, सेवेकरी, युवा मंडळं आणि महिला भक्तगणांच्या सहकार्याने संपूर्ण कार्यक्रम शिस्तबद्ध पद्धतीने पार पडला. रांगेत उभे राहून भक्तांनी समाधीस्थळाचे दर्शन घेतले. सर्वांना प्रसाद वितरणही करण्यात आला. गुरुपौर्णिमा ही केवळ एक धार्मिक घटना नसून, ती गुरू-शिष्य परंपरेचा आदर करण्याचा दिवस आहे. अशा उत्सवांमुळे भक्तीभाव वृद्धिंगत होतो आणि जीवनात आत्मिक समाधान प्राप्त होते, असेही मत अनेक भाविकांनी व्यक्त केले. कार्यक्रमानंतर श्री. संजय मच्छिंद्र चौधरी (नांदूर्खी, ता. राहाता) यांच्या सौजन्याने महाप्रसादाचे आयोजन करण्यात आले होते
यावेळी माजी आमदार भाऊसाहेब कांबळे, तहसीलदार मिलिंदकुमार वाघ, पोलीस निरीक्षक अरुण धनावडे, सहा.पोलीस उपनिरीक्षक रावसाहेब शिंदे, रामेश्वर ढोकणे, राहुल कचरे, मेजर् भवर, गोपनीयचे अनिल शेंगाळे, उद्योजक मंगेश नवले, साहेबराव औताडे, अर्जुन पानसंबळ, नीरज मुरकुटे, भाऊसाहेब बनसोडे, तृतीय पंथी गुरु पिंकी हाजी शेख, हभप कैलास महाराज दुशिंग, राहुल महाराज चेचरे, सखाराम महाराज जाधव, रेवजिनाथ महाराज शिंदे, संजय भवार, शाम महाराज राहणे, गोरख साबदे, पत्रकार विठ्ठलराव आसने, मनसे श्रीरामपूर शहराध्यक्ष स्वप्नील सोनार, भाजपा सोशल मीडिया तालुकाध्यक्ष पत्रकार संदिप आसने, आण्णासाहेब आसने, लक्ष्मण आसने, भाऊसाहेब मुठे, भाऊसाहेब वाबळे, येडू पवार, अर्जुन लोखंडे, नीलकंठ तरकसे, लखन महाराज, ज्ञानेश्वर काकडे, विश्वनाथ जाधव, अशोक कामगार पतपेढीचे संचालक भाऊसाहेब आसने आदी ग्रामस्थ मान्यवर मोठ्या संख्येने उपस्थित होते. कैलास महाराज दुशिंग यांनी आभार मानले.
